فلسفة الاربعين

فلسفة الاربعين

فلسفة اربعينك يا شهيد الدين
سر موصول وحيه ابخط وحي الثوره

ما تنعد مسير وناس تگصد ليك
تلطم عالصدر واتجود بالعبره

ولا تنعد شعار اعله اللسن ينگال
بس يومين يبقه ومحد ايذكره

ولا محفل عواطف يذكر المر بيك
ويلفه الزمان وينمسح امره

فلسفة اربعينك قافلة احرار
على اچتاف الثريه اشعاعها اتنشره

فلسفة اربعينك علّت اسم الدين
وذلت من يفكر يگدر ايضمره

فلسفة اربعينك سطّرت بامجاد
اسطورة بطولة اتحيّر اليقره

فلسفة اربعينك خطت ابلا خوف
عنوان الخلود ابصفحة الذكره

دامت لان زينب دگت الها الساس
وبأسم العقيدة اتحولت ثوره

فلسفة اربعينك صحت من النوم
الاف الضماير واصبحت حره

فلسفة اربعينك ثبتت بالكون
منهاج الولاية ورسخت فكره

فلسفة اربعينك تعني للحق صوت
رن باذن الي خلص بالجهل عمره

فلسفة اربعينك فسرت يحسين
مسألة ارتباط الثوره بالقدره

وكتبت لافته ابوجه السماء اتكول
نور حسين باقي ومحد ايستره

فلسفة اربعينك منها يا مولاي
نتعلم دروس وناخذ العبره

فلسفة اربعينك فوق كل تفسير
هي الحق البين محد اينكره

فلسفة اربعينك ما تحدها عقول
يا عقل اليحدد عالم اشكبره

فلسفة اربعينك بيعة يا مولاي
وابگبرك نعاهد كل سنة العتره
................
نسالكم ادعاء ع اللسان