روايه قلبي ما{ع}ـشق غيره00 للفراشه الرومانسيه

قلبي ما عشق غيره
تأليف \ الفراشه الرومانسيه
الجزء الاول

في ليالي الصيف الحار كان يخيم على شوارع المدينه الهدوء فالكل ملازم لمنزله بسبب الرطوبه
المعتاده في مثل هذه السنه 00
مضى الوقت وقد اشرقت شمس الصباح لاهلها 00 تبشرهم بقدوم يوماً جديد وفرج قريب من الله
في غرفه منار كانت تغط منار واختها ليل في سبات عميق ولم يدركوا الصباح الا بطرق والدتهم لباب الغرفه
تستيقط منار مسرعه وتناظر الساعه
منار \ ليل اصحي يالله لا تتأخري على مدرستك
ليل بثقل شديد \ طيب وهو يمدي الواحد ينام يعني ساعتين وتجي الصبح
منار \ بلاش فلسفه وانتي لو تنامي 10 ايام متتاليه ما تقولي بس قومي خلصينا
في صاله المنزل تنزل كلاً من منار وليل
منار بابتسامه وهي تناظر اهلها \ صباح الخير
الجميع \ صباح النور
حسن \ يللا يا ست الحبايب انا ماشي الحين تؤمروا شيء
منار \ لاتتأخر الظهر مو مثل كل يوم تأخير بالشوارع تخلص مدرستك وع البيت على طول
حسن مكشر \ زين زين 00 غيره فيه شيء
الام \ لا حبيبي روح الله يوفقك
منار \ يللا ليل اخلصي لايرن الجرس وانتي للحين ما خلصتي فطورك
ليل \ ياربي ما يتهنى الواحد لا بنوم ولا فطور
الام \ خلاص يا بنتي قومي اخذي الساندويش واكليه بطريقك للمدرسه
ليل وهي تحمل شنطه المدرسه \ طيب ماما 00000000 سلام
منار \ وانا بعد لازم اقوم عشان امر على مكتبي اخذ كم غرض واروح شغلي
الام \ الله يوفق لك ويفتحها بوجهك
-------------------------------------------
خرجت منار مسرعه من المنزل وتصعد مع سواق عملها 00000
وعند وصولها للمكتب تدخل بابتسامه
منار \ صباح الخير للجميع
الجميع \ عليكم السلام شفيك تأخرتي
منار \ غصب عني الشوارع زحمه شوي
ريماس \ تو داقه عليك ام جاسم تقولك ليش ما مريتي للحين
منار \ طيب انا جايه اخذ شغله صغيره وطالعه طوالي
وبهالوقت دخل مدير الدار
هاشم \ السلام عليكم
الجميع \ عليكم السلام هلا والله استاذ
هاشم \ ها منار اشوفك هنيه
منار \ اي جايه اخذ كم غرض ورايحه لبيت ام جاسم
هاشم \ طيب يا بنات اليوم بعد الظهر راح يكون اجتماع ياليت ماحد يتأخر
الجميع \ طيب
هاشم بابتسامه \ بالاذن
صفاء \ ياربي يجنني اذا ابتسم اسنانه كنها صف لولو
جنه \ يؤؤؤؤ جنت البنت استحي على وجهك
ريماس \ صفاء صاجه ضحكته تجنن صراحه والا شرايك يا منار
منار \ لايا معوده طلعوني من السالفه انا رايحه لا اتأخر
صفاء \ وانا بعد باروح لام فهد لا اتأخر وأخرها على دوامها
صفاء ومنار \ مع السلامه بنات
الجميع \ الله معاكم
-----------------------
تخرج منار وصفاء مع السائق لتذهب كلاً منهما الى مقر وظيفتها وتودع كلاًمنهما الاخرى
تنزل منار لبيت ام جاسم وتدق الجرس ويفتح جاسم الباب في الحال
منار \ صباح الخير جاسم
جاسم \ هلا والله وينك تأخرتي
منار \ اوه عسى الوالده مي معصبه
جاسم \ افا عليك ما راح تعصب عليك وانا يمك
منار باستغراب \ وانت ليش للحين ما رحت دوامك
جاسم \ وانا اقدر
منار باستغراب \ شنوو يعني ؟؟
جاسم \ لا ولا شي 00 بس تأخرتي صرت احاتيك ودقيت على مكتبك قالوا ما وصلت
منار \ اها 00 ان شاء الله ما تتكرر
وبهالوقت تقبل عليهم ام جاسم
ام جاسم \ اخيراً شرفتي يا أ ستاذه ؟؟
منار بخجل \ سامحيني بس علقت بالزحمه
ام جاسم \ طيب العيال نايمين بغرفهم الحين اروح وخلك معاهم ليما يصحون
واي شيء تبيه عندك الخادمه
وانت ياجاسم يللا قدامي
جاسم \ وين ؟؟
ام جاسم وين يعني ورا ابوك للشركه تأخرت عليه
جاسم \ طيب يمه بس للحين ما تروشت
ام جاسم \ اللهم طولك ياروح 00 هو يتأخر وبعدين ابوه يعصب علي انا
جاسم باحراج \ يمه خلاص عاد اتروش بسرعه واروح
ام جاسم \ يللا اشوفكم الظهر
منار \ موفقه
جاسم \ منار فطرتي لو بعدك
منار \ فطرت طبعاً ليش
جاسم \ قلت نفطر سوا
منار \ لا شكراً انا رايحه اشوف احمد ومروى مشتاقه لهم
وطلعت منار لغرف الاطفال عشان تشوفهم
جاسم \ يا ارض احفظي ما عليك 00 ذبحه هالبنت وربي
منار كانت الام الحنون للطفلين مروى واحمد وكانوا يحبوها كثير ومنار ما ملكت قلوب الطفلين بس
ملكت قلوب اللي بالبيت كلهم رغم ان ام جاسم كانت عصبيه جداً وانسانه عمليه
و في اثناء ملاعبه منار للطفلين فجاءه حست بباب الغرفه ينفتح ناظرت صوب الباب في اعتقاد منها الخادمه اتت
لمساعدتها في امر ما او سؤالها عن طلباتها ولكن كانت المفأجاه هي
منار باستغراب \ جاسم 00 انت للحين هنيه ؟؟
جاسم \ اي للحين هنيه فيها شيء ؟؟
منار \ لكن المفروض تكون بالشغل
جاسم \ مو مهم شوفتك تكفي 00 ولو اني زعلان تهتمي فيهم ولا تهتمي فيني
منار بحزم \ جاسم \ اتوقع انا مربيه للاطفال مو الكبار
جاسم \ خلاص خلاص وربي كنت امزح بل ما تتحملي مزح
منار \ فيه امور حلو المزح فيها وفيه امور مزحها مثل السم ما ينبلع
جاسم \ منار انتي انسانه طيوبه وتملكي قلب اي شخص يشوفك وانتي صار لك 3 سنين
صرتي جزء من عيلتنا ولا اتصور امي تجيب مربيه غيرك لاخواني
منار \ مشكور جاسم 00 بس لو امك تشوفنا بهالجلسه راح تطردني شر طرده وماراح تشوفني للابد
جاسم \ لا قالها الله لاتفاولي زين
منار \ رجاء جاسم اطلع من الغرفه خلاص
جاسم \ طيب بس توعديني تكوني هنا على الغذاء
منار \ ما اقدر اوعدك لان عندي شغل بعد الظهر في المكتب
جاسم \ طيب تبي اوصلك
منار \ لامشكور عندي السائق
جاسم \ امانه خليني اوصلك
منار \ جاسم خلاص عاد عطيتك وجه ممكن تطلع
جاسم مكشر \ طيب
منار \ جاسم
جاسم \ هلا يالغاليه
منار \ لو سمحت مره ثانيه لاتدخل الغرفه وانا موجوده قبل ما تدق الباب
ياليت تحط هالكلام حلق باذنك
جاسم \ تؤمري امر يالغاليه 000000 شااااو
منار تضحك \ مجنوون
--------------------------
بالمكتب كان الكل تحت اجواء العمل ومع شوي مزح وكلام
ريماس \ شفيها منار ما جت للحين الساعه 2.30
صفاء \ منار من تشوف مروى واحمد تنسى الدنيا دقي عليها شوفيها
تدخل جنه على البنات \ وووووي جننوني الاطفال بالروضه
صفاء \ ليش بقى اطفال ماخذوهم اهاليهم للحين
جنه \ بس عائلتين ماجت
صفاء \ طيب اقوم انا اشرف عليهم
جنه \ مشكور غناتي
صفاء وهي طالعه من المكتب \ اوه كاهي شرفت المسعده
ريماس \ مناروه شفيك تاخرتي
منار \ اووف ياربي يومي مو حلوو 00 تعب وتعكيرات وشغل اضافي بعد
ريماس \ باقي ربع ساعه عن الاجتماع 00 قومي تغذي بالمقهى
منار \ لا تغذيت معاهم اصروا علي الا اتغذى
ريماس \ اهاااا 00 قلتي لي
منار ترمي القلم على ريماس \ اقول عدلي تفكيرك احسن لك
جنه \ اقول منار 00 شخبار جاسم
منار \ جنووووه مو رايقه لك انتي بعد
ريماس وجنه \ ههههههههههههههههه
تدخل عليهم صفاء \ بنات شفيكم شكلكم معصبين منوره مسكينه
منار \ تعالي تكفين فكيني منهم
صفاء \ اكيد على طاري جاسم موو
منار \ شفيكم والله مجرد اخو لاطفالي مروى واحمد ومالي شغل فيه
صفاء \ هههههههه طيب طيب 00 قوموا الحين الجماعه سبقونا ع الاجتماع
الجميع \ يللا
--------------------------
فبيت ام حسن
حسن \ يمه وين منار
ام حسن \ راح تتأخر اليوم
حسن \ الله يعينها اختي تعبانه عشان تعيشنا
ام حسن \ شنسوي بعد الامر لله
حسن \ ان شاء الله اتخرج واساعدها
ام حسن \ الله يوفق ياعيني ويبلغني فيك وفي اخوانك
--------------------------
في الدار وبالتحديد في غرفه الاجتماعات
هاشم \ نهايه الاسبوع ان شاء الله راح تكون اللجنه رحلتنا الشهريه لاحدى المنتزهات
البنات \ حلو جداً
هاشم \ طبعاً كل مربيه او ام منكم راح تكون مسؤوله عن اطفالها
منار \ هذا شيء اكيد وما يحتاج له وصايه
هاشم \ اذا فيه ام ما تقدر تحضر الرحله وتشرف على الاطفال تبلغني من الحين
صفاء \ اهم شيء استاذ انك تكون موجود
هاشم \ طبعاً لازم اكون موجود مو انا ابو لهم كلهم وانا حاب الدار تكون من افضل
ما يكون مابي اي نقص فيها
صفاء \ دام انت بتكون موجود كل شيء يهوون اكيد
هاشم \ هههههه تسلمي والله
صفاء تقرص جنه \ ويلي على حالي
هاشم \ طيب الحين كل واحد يقدر يتفضل يشرفنا على بيته ونلتقي بكره
واسف على تأخيركم
صفاء \ لا بالعكس انبسطنا كثير
هاشم \ يللا اشوفكم على خير
الجميع \ حياك الله
ريماس تضرب صفاء \ وانتي ما تقضبي لسانك
صفاء \ ااااي ليش اقضبه وانا شقلت
جنه \ هههههههه البنت تلمح 00 مو علينا هالحركات
منار \ يالله اناباروح تعبانه حيل يللا سلاموو
الجميع \ وحنا بعد نقوم شناطرين
صفاء \ اقوم الحق على استاذ هاشم قبل لايطلع سيارته
جنه \ وربي مجنوووووووونه صفاء
-------------------------
فبيت ام منصور
منصور \ يمه ليش ما نزور بيت خالتي الليله نشوف شنو ناقصهم
ونسير عليهم وكمان وحشني الدب حسنوه
ام منصور \ دق عليه شوف اذا فاضيين نروح ليهم ليش لا
ندى \ اي والله صج اشتقت لا ليل ومنار موووووووت
منصور \ اي والله ليهم وحشه ومنار بالذات
ندى وهي تغمز \ ايوا ايوا ياحركات
ام منصور \ الله يجعل نصيبك فيها ياوليدي
منصور \ يارب يمه ما نسى ابوي قبل لايتوفى وهو يوصيني عليهم
ام منصور \ ايه الله يرحمه
منصور \ واللي كاسر خاطري ان هي اللي شايله البيت على راسها ومضحيه عشان
اخوانها وامها
ام منصور \ وانت ياوليدي الله طرح فيك البركه والخير وعقبال ما نشوفك معرس
منصور يدق على بيت خالته وترد عليه ليل
ليل \ الوووو
منصور \ هلا وغلا
ليل \يااااااي منصور شخبارك
منصور \ منيح انتي كيفك بنت خالتو
ليل \ اوه مسوي فيها بعد طيب 00 كلنا مناح الكن وحشه
منصور \ خلاص اذا ما عنكن شيء راح نزوكن الليله
ليل \ بتشرفونا
منصور \ ليلوووووووه
ليل \ بي توك شحلاتك
منصور \ ههههههههههههه
ليل \ اي صج حنا الخليجين خشنين لي بغينا نصير رومانسيين قلدنا سوريا ولبنان
منصور \ انطمي يادبه و قولي لي شخبار منار
ليل \ ممممممممم زينه
منصور \ وينها هي
ليل \ نايمه عشان تعبانه من الشغل اليووم ماتطول شوي وتصحى
منصور \ اهااااااااا 00 سمعي ياويلك ان جينا الليله وهي نايمه والله امصع كشتك
ليل \ وانا بنت ابوي ماتقربني واخوي حسن
منصور \هههههههههههه الا على طاريه وينه
ليل \ تعرف هياااته ما يرجع الا وقت الصلاه تبي شيء منه
منصور \ ماكو بس ياويله لو مايقعد الليله
ليل \ لاتحاتي افا عليك اعتمد علي
منصور \ فديت احلى سحليه والله
ليل \ عفواً كنك غلطت يا التمساح
منصور \ هههههههههههههه والله ماحب فيك الا خبالك
ليل \ خخخخخخخخ ياخفه دمك
منصور \ اقول امحق عليك خلينا اقووم اتروش قبل الصلاه عشان اروح المسجد
ليل \ ووي فكه منك مابغيت تقول مع السلامه
منصور \ مالت على خشتك باااااااي
ليل \ باااااي
----
منصور \ يمه انا قايم اتروش واروح المسجد تبي اجيب لك شيء برجعتي
ام منصور \ خذ لنا مشويات عشان روحتنا لبيت خالتك
منصور \ بس ياليت يمه ارجع القاكم جاهزين
ندى \ طيب لا تخاف
منصور \ نشوف حنا
---------------------------------
فبيت ام حسن
يدخل حسن بعد الصلاه ورجعته من المسجد
ليل \ حسنوووووووه
حسن \ خير شعندك يالمربوشه
ليل \ منصور بعد شوي وخالتي وندوش راح يجوون
حسن \ خيراً
ام حسن \ ليل 00 منار يللا تعالوا ساعدوني
منار \ طيب ماامي
تروح منار وليل وحسن معاهم ويتساعدوا بشغل المطبخ وتحضير العشاء
ام حسن \ شخبار ام جاسم معاك
منار \ على حطة يدك ع اخلاقها لاتغيرت ولا شيء
بس اللي مخليني اتحملها مروى واحمد
ليل \ اوووه صوت الجرس الظاهر الخاله وصلت
وتروح ركض للبااااب
الجميع \ السلام عليكم
ليل \ هلا خالتي عليكم السلام
منصور \ كيفك ليوول
ليل \ اهلا وسهلا
ندى تحضن ليل \ كيفك بنت الخاله
ليل \ بخير وحشتيني مووووووووت
ام منصور \ وين امك
ليل \ بالمطبخ الحين اناديها
ام منصور \ لا ما يحتاج الحين اروح لها
منصور \ اجل وين حسن
ليل \ بالمطبخ وياهم
منصور\ يمه نادي حسن خله يجي
ام منصور تدخل المطبخ وبيدها اصناف من الطعام \ السلام عليكم شلونكم شخباركم ؟؟
الجميع \ عليكم السلام هلا والله بأختي الغاليه شلونك انتي
منار تحب خالتها على راسها \ شلونك خاله ؟؟
ام منصور \ يسرك الحال الحمدلله 0000 حسن يمه منصور يبيك بالصاله
حسن \ ان شاء الله خاله
-----------------
بالصاله
حسن \ نصووووووووور
منصور\ هلا ابو علي
منصور \ هلا فيك يالغالي شخبارك
حسن \ احنا بخير يا كابتين
منصور \ الحمدلله 00 الا وين باقي الاهل
حسن \ الحين جايين يحطوا الاكل بالسفره
منصور \ ندى 00 ليل يللا قوموا ساعدوهم
ندى \ ان شاء الله ياخوي
ليل \ يالله ندوي
واثناء دخلوهم المطبخ تطلع منار منه
منار \ اووووووووه ندوي شخبار
ندى \ هلا وغلا فبنت خالتي وحبيبة الحابيب تعالي ابوسك تعالي
منار \ شفيك ندى جنتي اسم الله عليك اي حبايب واي بطيخ
ليل \ احم احم يللا ندى نمشي عن الاستعباط
منار مشت عنهم وراحت للسفره
ندى \ ليلوه شرايك تنادي اخوك حسن يجي هنا ونخلي منصور ومنار بالصاله شوي لحالهم
ليل \ فكره حلوه 0000000000 حسن حسن
ويقوم حسن يروح لعند اخته
منصور \ شفيهم هذولي كلهم مشوا وخلوني خلني اقوم ع السفره دام شذيه
يجي منصور عند السفر ويلقى منار ترتبها
منصور وكله وله يتأمل روعه منار وجمالها ويستغل فرصته دام محد يمه
منصور \ منـــــــــار
منار بابتسامه \ اوه منصور والله ما شفتك 000 شخبارك
منصور \ توني صرت زين
منار \هههههههههه اكيد بشوفتي
منصور \ اكيد يابنت خالتي
منار \ والله وحشتني سوالفك
منصور \ ها عندك شيء تبي تحكي لي عنه ؟
منار \ لا ما كو شيء محدد بس مبسوطه كثير اني شفتك
منصور \ انا اعرف انك ترتاحي بالكلام معاي وخصوص قرب العمر والتفكير بينا
منار \ انت مستحيل الاقي مثلك اصلاً الله لايحرمني منك ياولد الخاله
منصور وهو يقعد على الكرسي \ خاطري نسوي لنا طلعه عائليه كذا نجمع العيله من جديد
منار \ ممممممممم المشكله شغلي ايام يأخذ كل وقتي
منصور \ منار 000
منار \ هلا
منصور \ أنا 000 أنا 00
منار باستغراب \ أنت شنو
منصور \ أنا
وبهالوقت يدخلوا ليل وندى
ليل \ طبينا عليكم
ندى بصوت خافت \ بشر شصار 00؟
منصور بغضب \ انتي ويا وجهك كنت باخبرها بس دخلتي
ندى \ شسوي امي تسأل عنكم خفت تطب عليكم قلت اجي اشوف الوضع احسن
منار \ شفيكم تتهامسوا كنكم عصافير اذا تبونا نطلع انا وليل نخليكم
منصور \ لااااااااا ندى تطلع ولا انتي
ليل \ هههههههههههههههه
منار \ طيب خلني الحين اساعد امي وبعدين نكمل سوالفنا قومي ليل
منصور سند راسه عالكرسي \ تصدقي ندوه احبهاااااااا
ندى \ وي وي آآآه يا قلبي خلني المس قلبك اجس نبضك
خنت حيلي متعبك الحب
منصور \ تعرفي احس اني اكلم وحده خبله ما تفهم شيء والله الشرهه علي احكيك بشيء دلفي عن وجهي
ندى \ مالت عليك بس خلني اروح اشم ريحه الاكل احسن لي من مجابلك
وتطلع ندى بسررررررررعه من غرفه الطعام ويحصل اصطدام والمفاجأه كانت بحسن
حسن \ أأأأأأأي
ندى \ آآآآآآآآه
حطت ندى يدها على فمها من الخجل وحسن ما قال ولاكلمه بقى متسمر بعيون ندى وجنونها
وندى نست الدنيا بعيونه
اقبلت منار بهالوقت عليهم ومعاها العيله وراها
منار \ حسن 00 شفيكم
ندى \ ولا شيء وراحت ندى طاوله الطعام ولا رفعت راسها بوجه بن خالتها ابداً
الكل تسمر بالاكل وكانت الجلسه كلها سمر وسوالف
منار \ انا طالعه غرفتي انام 00
منصور \ ليش 00 ؟
منار \ سامحووني وراي بكره شغل مهم ومن الصبح والحين 11 ولا نمت
منصور \ هذي طرده ؟؟
ام منصور \ يؤؤؤؤؤؤ جت 11 وحنا لسا هنيه
ام حسن \ شفيها يعني لو جت 11
ام منصور \ العيال عندها دوامات بكره لازم يكونوا بالفراش الحين
ام حسن \ ابقوا معانا والصبح يروحوا العيال سوا
منصور \ هههههههههه خالتي راح تلبسيني ثوب حسن يعني
حسن \ هههههههههه اتخيلك لابس ثوب قصير ورايح دوامك
ندى \ انا قصتي محلوله عادي لو نمت هنيه تكفين يمه خلني انام
ام منصور \ اقول قومي وبلا هبال اذا المريول انحلت مشكلته كتبك شلون
ليل \ عادي بكره الصبح نمر عليهم
ام منصور \ بكره الخميس اخليها تنام معاكم زين شذيه
ليل \ تسلمي يا احلى خاله بالدنيا
ام منصور \ يللا مع السلامه
الجميع \ الله يسلمك
-------------------------
خيم الظلام على شوراع المدينه فالكل اصبح ملازم لمنزله لاخذ قسطت من الراحه
بانتظار اشراقة الشمس من جديد ومع امل جديد
ولكن ياترى كيف تغفي عيون من قلوبهم اشغلها الحب 00 ؟

يعطيـــــــــــــــكـ الــــ ع ــافيه على القصة الحلوة..
مـــ ع مزيد من التقدمـ ..
دمتمـ بحفظ الله..

مشكوره مره على المجهود الرائع وجزاك الله خير وماقصرتي
والى امام انشاء الله